Mir möchtet nur das Fasnachtsvirus zu eu bringe,
drum tüent mir virtuell es Schnitzelbänkli singe,
es isch coronafrei das tüend bewusst mir mache,
und hoffet sehr mir bringet eu e chli zum Lache!

De Wisel Gmür en CVP-ler vo de Alte,
doch möcht au er das "C" im Name nümme bhalte,
sis neue Mitti Motto heisst "Ehe für alli",
öb das im Chlouschterdourf echt würkli allne gfalli?

Immer grösser, immer runder, immer praller,
normalerwiis sind schöni Kurve ächt de Knaller,
doch i dem Jahr sind's alles andre als en Kracher,
denn euse Bundesrat wett Kurve lieber flacher!

Bi eusre Schnitzelbank, do gits kei Frauestimme,
politisch chönnt sie scho sit 50 Jahr mitbestimme,
doch scho sit langem tuet ei Frag eus ganz fescht quäle,
werum genau tüend Fraue keini Fraue wähle!

Chli Luxus tuet de Markus Feusi sich bewahre,
Zigarre rauche und e dicke Schlitte fahre,
er fiiret Party gross und lut als gäbs kei Morge,
drum muess denn Polizei für Rue und Ornig sorge!

Sie kletteret dur d‘Fenster ie und über Muure,
im Capitol stönd plötzlich komischi Figure,
e schlechti Nachricht und das isch tatsächlich bitter,
de Donald Trump cha nümme schriebe jetzt uf Twitter!

Im Altersheim in Wollerau do tüend sie früre,
scho gli chönnts Zeche und au d‘Finger nümme gspüre,
s‘isch chalt und d‘Heizig ja die wott und wott nöd laufe,
sie hättet für de Winter Heizöl sölle chaufe!

I dene Ziite wo all müend deheime bliibe,
Restriktione und Massnahme müend verliide,
und au de FC chan nümm tschutte, das isch saublöd,
doch simmer ehrlich, chöne händses vorher au nöd!

Im Pfadihuus do chammer guet es Fäschtli mache,
doch nöd all Gäscht vo det sind richtig durrebache,
sie sind betrunke, aber nei sie tüend nöd schlegle,
defür bim Minigolf i d'Löcher ine gegle!

Ja CVP wott ihre Name nümme bhalte,
und als "Die Mitte" wänd's jetzt euses Land verwalte,
au fusioniere das isch sicher au kei Fehler,
doch s'einzig was ne gliich no fehlt sind ihre Wähler!

S'wird huufe Gäld usgeh für Kampfjets und für Rente,
em Blocher gohts nöd guet, er brucht die Alimente,
doch mir händ d'Lösig, hälfed ihm us dere Patsche,
gönd uf de Balkon für de armi Herr go klatsche!

Sie demonstriered Black Lives Matter und so wiiter,
all sind am brüele und gsehnd s'Läbe nur no schiiter,
d'Fidelitas cha mit de Träne guet mitfühle,
statt um de Beckitogg müends das Jahr online hüüle!

 

Schnitzelbank 2021 Strophen

 


 

Film bei vimeo.com sowie bei Apple TV mit gratis App vimeo und dort unter Search nach "stvwb" suchen.

 

 Auch empfehlenswert: Turnerkränzli 2020 als Film «Wo wart ihr? Wir haben euch vermisst!»

Raiffeisen HOME 1200px

Zum Seitenanfang

Hintergrund Jubiläumsturnfahrt